🔴🔴
حسن إسماعيل يكتب ..
أنت ثورى ؟ إذن انت غبى !! ..
ـ هذا المعنى وهذا التعبير محدود (صلاحية الاستخدام) ..يصلح للإستخدام ليوم ( 30 سبتمبر 2021) …!! وللذين خرجوا فيه …
ـ ولتبيان ماأريد قوله عزيزى ثائر ( الخميس) فسأتحدث معك بالفصيح و ( الدارجى ) !!
ـ حسنا …هل خرجت ثائرا يوم أمس الخميس من أجل ما يسمى دعم التحول الديمقراطي او الإنتقال المدنى ؟ إذا كانت الإجابة نعم فعفوا يعنى …أنت غبى ومافاهم حاجة وعليك ان تتخلص من اذنى الحمار التى فوق رأسك …وأن تمسك ( بالبردعة ) التى فوق ظهرك (وتجدعها) بعيد وان تنزل ( بضم التاء) هؤلاء الذين يمتطونك منذ سنين
ـ أعطني أذنك ولاتقاطعنى …أذنك الصغيرة وليس أذن الحمار !! ( معليش يعنى )
ّـ جاوبنى …هل خرجت قبل سنتين من الآن لتحتفل فى شوارع الخرطوم بتوقيع الوثيقة الدستورية ؟ هل الإجابة نعم ؟ طيب مالك ؟ الحكومة الحالية هى بنت تلك الزيجة …الزيجة الحضرت حفلتها وعرضت فى قطع رحطها …تانى مالك طالع ؟
ـ طيب …كنت بتجى ميدان الإعتصام ؟ أيوة ؟ أها سمعت خالد سلك وهو بنوركم بالمفاوضات وقال ليكم اتفقنا على مجلس سيادة شرفى ماعندو صلاحيات نصو مدنيين ونصو عسكر ؟ طيب إنت صفقت ونططت وفرحت ..الجديد شنو ؟ ياهو ده اتفاق ناسك …الليلة متظاهر ضد شنو انت ؟
ـ ماسامعك !! التحول المدنى ؟ يعنى شنو ؟ أهااا …تطردوا المكون العسكرى خارج السلطة؟ ياخى دى ماعايزة مظاهرات تركب تجيها من عطبرة وله من بربر …دى عايزة ناسك المدنيين الفى الحكومة يعملوا مؤتمر صحفى ويعلنوا إبطال العمل بالوثيقة الدستورية …أيوة الوثيقة الدستورية الإحتفلت بيها دييك …يلغوها ويبقوا مارقين ويشوفوا ليهم لجنة أمنية تفتح ليهم شوارع القيادة ويمشوا يعتصموا ويسقطوا برهان ( ده لو بقدروا يعنى )!! …لكن يعبوك إنت زى كيس الآيسكريم..يملوك هوا ويطقوك طااخ ويقولوا ليك أطلع شتم لينا العساكر وهم يمشوا يواصلوا الإجتماعات مع العساكر ويجيزوا الموازنة …أيوة الموازنة الحررت السوق وضربت الأسعار فى (1000) ..ّّ.. تبقى انت مجرد ( تور عميان ) مش ثائر
ـ طيب نرجع للتحول المدنى والإنتقال الديمقراطى.. العساكر قالوا نمشى نعمل الإنتخابات ، حمدوك قال نمد الفترة الإنتقالية تانى أربعة سنة !! وقحط قالت الإنتخابات مؤامرة على الثورة !! أسى المحتاج يتظاهروا ضدو منو ؟ ( إنت مانصيح ) ؟
ـ بعدين انت عارف أهم أركان الحكم المدنى شنو ؟ وله إنت زى ناس الكيته تنفخ وتدق وماعارف العريس منو ؟ ياخوى ..أركان الحكم المدنى مجلس منتخب ومستقل للتشريع والرقابة ، وقضاء ومحكمة دستورية …كدى راجع الأركان دى فى ؟ والمغيبه منو ؟ مغيبنها ناسك الجابوك مظاهرات ( الضهر) وفرقوك بالمبان العصر ….
ـ الحاصل ده …شراااكة بين لجنة البشير الأمنية وأربعة أحزاب من قحط وإنت مشغلنك (فزاعة) …أيوة الفزاعة البركبوها فى الحواشات تخوف الطير …. وإنت سبب واحد يخليك تبقى فزاعة وله طيرة مافى …
ـ ( أنت تغنى منذ سنين فى الحانات وشيخك يشرب ….هذا عشق أجدب ) !!
ـ أها دى القصة …طبعا كنت عايز اقوليك إنت زول مسكين …لكن المسكين ده البسرقوا حقوا من جيبوا وهو ماعارف ….بس الغبى هو البشيلوا حقوا ويركبوا فى ضهروا يوصلوا السارقنوا لحدى بيوتهم !! وهو بهتف كمان
ـ عزيزى (الثائر) …لو عندك طاقة زايده أمشى كافح (القبور) فى فى مشروع الجزيرة وله أمشى طلق كرعيك طارد الأرانب فى البطانة …ماكعب
ـ كعب ينقط عرقك ورا (تلاتة أرباع) من ناس قحط
ـ عيب تطلع تناصر ليك ناس واحد من أعضاء مجلس السيادة تبعهم قال فى تلفزيون السودان :- لينا كم شهر إجتماعاتنا لتزجية الفراغ فقط ….
ـ شفت كيف ؟ الراجيهم إنت بزجوا وقت الفراغ فى مكاتب الدولة وفى الإجتماعات و ( أنت أرجى سفيه ..ماترجى عاطل ) !!
ـ وآخر حاجة …عايز أديك التمرين الصغير ده …أمشى اشتغلوا بينك وبين روحك براااحة كده
ـ طيب ؟
ـ علماء السياسة بعرفوا الثورة بأنها ( فعل شعبى يحصد نتائجه جموع الشعب هدفه تغيير الأوضاع القائمة إلى الأفضل)
ـ اطلع اقرأ التعريف الفوق ده تانى ….
ـ قريتو ؟ يلا جاوب
ـ من سنتين …شنو الإتغير للأفضل؟ …أبدأ من روحك ..وأمك وأبوك وأهلك .. وأمشى على الأسعار والعلاج والتعليم والأمن والمستقبل ….
ـ جاوب براك وقرر ….واطلع من حتة توصيف عنوان المقال الفووق ده …ماتبقى غبى !!