خالد شقوري يكتب : الحصة ويكة

طبعا الست الويكة دي نحن حاقرنبها حقارة شديدي خلاص مع انو دمنا بتكون من كريات بيضاء وحمراء وويكة

وعشان ما اشيل حال الناس ابدأ بنفسى اول .. انا اكتر زول حقرتبها ..
زمان ابوي الله يرحمو ويرحم جميع ابواتنا كان زارعلو ويكة وسط التمر ويوم جيت داخل لقيت فرع ويكة طويل طول غريب لامن مقرب للسبيطى .. وبكل حقارة قلتلو

إن طُلت السمي
إياكا فرع الويكة
وان جيت الارض
برضو العليكا عليكا
طول بين الخدار
والرجلة و التمليكا
بس بين النخل
احسن تغتى وشيكا

المهم .. قبل نجي لحقارة الناس للويكة داير اقول انو الويكة دي فيها قيمة غذائية عاليةجدا (حسب افادة ناس التغذية) والدليل انو تلتين اكل اهل السودان معتمد عليها اعتماد كلي .. وتبارك الله شايلا حيلنا وشايلين حالها

وبعد ده يجيك واحد.. يقولك كرهتونا بالويكة .. والويكة دي ما أكل .. نان يا العشي اب لبن فقهتك دي سويتا من البيتزا وللا من الهوت دوغ .. عمرك كلو تلهط فيها لامن تلحس اصابعينك..

طبعا قمة الحقارة.. شعراء الغزل يوصفو البت بفرع السيسبان وفرع شنو وفرع شنو ولامره مافي واحد قالها تشبهى فرع الويكة مع انو لين ويميل مع النسمة ..وطبعا بالمقابل اي زول عبيط يقولولو لايوق متل الويكة

غايتو شدة مامعتمدين على الست الويكةلامن منوعين الاسماء والاستخدامات.. بامية طبيخ وبامية فرك وويكةحمرة ومرة نقولها تقلية وويكة بيضا وام رقيقة وام شعيفة ومرة ناكلها بالكسرة ومرة بالقراصة ومرة بالعصيدة ومرات نفركها مع السلج ومع الورق ..وياحلاتها لما نلقط سبروقها .. وانا غايتو مرات اذا دعا الداعي بحشيها في عيشة ودايما دي بتصادف جوعة الساعة اتناشر وتكون الكسرة ماعاسوها..

وطبعا البامية المفروكة مهما عملت حسابك بتصل هدومك .. واحد قال يمين المفروكة دي كان علقت جلابيتك في الشماعة بتصلها..

حتى اسماء الدلع حقتها شترة .. في ناس بسموها الجليط وناس يسموها النوكريم ..

ورغم ذلك نظل مدينين لهذه الأكلة العجيبة التى خرجت اجيال واجيال في صمود غريب ..

غايتو لو ماهي والفول كان لحقنا أمات طه بدري

تحياتى

خالد شقوري